Air—“Kiss't yestreen.”
THE lassies a leuch, an the carlin flate,
But Maggie was sittin fu ourie an blate,
The auld silly gawkie, she couldna contain,
How brawlie she was kiss't yestreen ;
Kiss't yestreen, kiss't yestreen,
How brawlie she was kiss't yestreen ;
She blether'd it roun tae her fae an her frien,
How brawlie she was kiss't yestreen.
Additional verses :—
She loosed the white napkin frae bout her dun neck,
An cried—‘The big sorrow tak Lang Geordie Fleck ;
D'ye see what a scart I gat frae a preen,
By his touslin and kissing at me yestreen ;
At me yestreen, at me yestreen,
By his touslin and kissin at me yestreen :
I canna conceive what the fallow coud mean
By kissin sae meikle at me yestreen ?’
“Then she pu'd up her sleeve, and shawed a blae mark
Quoth she—‘I gat that frae young Davie, our clark ;
But the creature had surely forgat himsel clean
When he nipt me sae hard for a kiss yestreen ;
For a kiss yestreen, for a kiss yestreen,
Whan he nipt me sae hard for a kiss yestreen :
I wonder what keepit my nails frae his e'en,
Whan he nipt me sae hard for a kiss yestreen.
“Then she held up her cheek, an cried—‘Foul fa the laird,
Just leuk what I gat wi his black birsie baird !
The vile filthy body ! was e'er the like seen!
Tae rub me sae sale for a kiss yestreen ;
For a kiss yestreen, for a kiss yestreen,
Tae rub me sae sair for a kiss yestreen,
I'm sure that nae woman o judgment need green,
To be rubbit, like me, for a kiss yestreen.’
“Syne she tald what gran offers she aften had had,
But, wad she tak a man ! na, she wasna sae mad :
For the hail o the sex she car'd nae a preen,
An she hatit the way she was kissit yestreen ;
Kissit yestreen, kissit yestreen,
She hatit the way she was kissit yestreen ;
Twas a mercy that naething mair serious had been,
For its dangerous, whiles, tae be kisst at e'en."
[Semple 141]